Matt. 21,1- 11.
Då dei var komne til Betfage ved Oljeberget, og ikkje hadde langt att til Jerusalem, sende Jesus to læresveinar i veg og sa til dei: «Gå inn i den landsbyen som ligg framfor dykk! Der finn de straks eit esel som står bunde, saman med folen sin. Dei skal de løysa og leia til meg. Og er det noko som spør dykk, skal de seia: Herren har bruk for dei. Då sender han dei hit med ein gong.» Dette hende for at det skulle oppfyllast, det som er tala gjennom profeten, når han seier: Sei til Sions dotter: Sjå, kongen din kjem til deg, audmjukt rid han på eit esel, folen til eit kløvdyr.
Læresveinane gjekk av stad og gjorde som Jesus hadde sagt. Dei henta eselet og folen . Så la dei kappane sine på dei, og han sette seg oppå. Mange i folkehopen breidde kappene sine på vegen, andre hogg greiner av trea og strøydde på vegen. Og folket som gjekk føre, og dei som fylgde etter, ropa: Hosianna, Davids son! Velsigna vere han som kjem, i Herrens namn! Hosianna i det høgste!
Då han drog inn i Jerusalem, kom heile byen i rørsle og spurde: «Kven er dette? Og folket svara: «Dette er profeten Jesus frå Nasaret i Galilea.»
Det er første søndag i advent, og teksta fortel om då kong Jesus kom til Jerusalem. Jerusalem tok ikkje imot kongen, og det vart deira ulukka. (Luk. 19,41- 44.)
I dag , og i veka som ligg framføre bør vi tenke slik: Kong Jesus er på veg til meg, korleis kan eg ta imot han på rett måte?
- Bytt ut noko av den vanlege julestria og bruk meir av tida fram mot jul til å bli kjent med Jesus.
- Ta imot kong Jesus, gje han rom i hjarta og heim, og fortel til andre at du har gjort dette.
Himmelen vil gleda seg, og du får den verdfullaste gåva, – det er tilgjeving for alle synder.
